Sibuyas: Paano nga ba ito nakakatulong sa ating kalusugan?

Sibuyas

Ang sibuyas ay karaniwang nakikita sa kusina ng ating bahay, at ito ay madalas din ginagamit na sangkap sa halos lahat ng lutuin.  Ang sibuyas ay nagmula sa Asya at Gitnang Silangan, pinakapopular na itanim mga 5,000 taon ang  nakakaraan. Hindi lamang ito ginagamit panluto bagkus ay ginagamit itong pambayad ng mga sinaunang Egyptian, ganun din ang pagsamba nila dito sa kadahilanang ito raw ay nakakapagbigay sa kanila ng buhay ng walang hanggan. Sinasabi rin na inilalagay nila ang Sibuyas sa libingan ng Hari ng Ehipto na namatay sapagkat ito raw ang aakay sa kanila sa kabilang buhay.    Bukod dito, may alamat din na kapag ito raw ay nilagay sa namatay na tao ay muli raw itong mabubuhay sa loob ng sibuyas at maging mas malaki ang pakinabang dahil sa antiseptikong taglay nito.

Gamit ng Sibuyas

Maraming gamit ang sibuyas, bukod sa rekado sa pagluluto at pangunahing sangkap sa ibang lutuing Asyano at Indian, ang iba’t ibang parte nito ay maaring magamit sa iba’t ibang paraan.  Tulad na lamang ng balat ng sibuyas, maari itong gamiting pampakulay, maaari din itong pantanggal ng mga amoy tulad ng pintura at iba pa, pampakintab ng metal, at pampaalis ng insekto.  Maaari din daw makagamot ng iba’t ibang klaseng sakit ang sibuyas.

Iba’t Ibang Uri ng Sibuyas

Sa mga palengke o sa paborito nating pamilihan ay makakakita tayo ng iba’t ibang uri ng sibuyas.  Ilan dito ay ang sumusunod: 

1.        Dilaw na Sibuyas o Yellow Onions

Matamis ang lasa ang uri ng sibuyas na ito, dilaw o golden ang kulay  ng balat at pale yellow ang nag kulay ng laman nito.  Madalas itong ginagamit sa pagluluto dahil sa tamis ng lasa nito at mahusay na gamitin lalo na kapag gumugawa ng onion soup.  Ang uri ng sibuyas na ito ay lalong tumatamis habang tumatagal sa pagluluto.

2.       Pula na Sibuyas o Red Onions

Ito ang pinakamaanghang sa uri nito, kulay pula sa labas at medyo mapulang maputi sa loob.  Mabilis din mabulok ang uri ng sibuyas na ito kung kaya’t hindi ito maaring itago ng matagal.  Ginagamit din ito sa pagluluto, rekado para sa salad at palaman sa tinapay.

3.       Puti na Sibuyas o White Onions

Bihira makita ang ganitong uri ng sibuyas sa palengke, kulay puti ito sa labas at ganoon din sa loob nito.  Sa lahat ng uri ng sibuyas ito ay maari mong kainin mapahilaw o luto. Madalas din itong ginagamit ng mga Mehikano sa pagluluto.

4.        Berde na Sibuyas of Green Onions/Spring Onions

Ito ay tinatawag na sibuyas na mura na pwedeng kainin kahit hilaw, maari itong gawing palamuti at pampalasa sa mga lutuin.

 

5.       Shallot

Uri ng sibuyas na medyo maliit at hugis pahaba. Maihahalintulad din siya sa bawang na ang isang buo maliit na shallot naglalaman ng dalawa o tatlong piraso at ang malaki naman ay naglalaman ng hanggang anim na piraso.  Katamtaman lamang ang lasa nito hindi tulad ng ibang klaseng sibuyas na umaangat ang lasa sa mga lutuin kung kaya’t mas mainam siyang ihalo sa salad na hilaw.

Nutrisyon na Makukuha sa Sibuyas

Mayaman sa Sulphur ang Sibuyas, na dahilan kung bakit ito ay may matapang na amoy at maaring makagaling.  Ang Flavonoid particular ang Quercetin ay mahusay na antioxidant ay tinataglay din nito.  Gayun din sa mga bitaminang, B6, C, Biotin, K, Folic Acid, Chromium, Calcium at Fiber. May mga mineral na nakukuha din sa sibuyas tulad ng Magnesiium at Potassium.

Sources:  http://phildigest.jp/the-benefits-of-eating-onions-everyday/ ; https://www.thespruceeats.com/what-are-shallots-1807054